【On.cc】蔡思貝拍《功夫女足》胯下拉傷險斷筋　恨做「星女郎」講心唔講金

現年35歲的蔡思貝自2023年拍攝無綫劇《飛常日誌》，直至離巢為止再未有拍劇機會後，毅然由電視劇轉戰影壇，獲周星馳（星爺）給予機會，參與現票房至今達26億港元的電影《功夫女足》，飾演娥眉足球隊的視障按摩師兼盲人隊醫「孖八」，人氣成功絕地反彈。

日前思貝和片中「串星」張繼聰齊接受訪問，談及「孖八」其角色近乎全程戴墨鏡遮面，真面目只得1秒鏡頭時，她坦言曾擔心過「出鏡率」：「嗰陣時都有討論過我全程遮面，會唔會唔知道係我演呀？但要相信導演Judgement，黑超係呢個角色嘅特色、靈魂之一，但導演畀咗1秒大頭我，見到我個樣同對眼，係『孖八』嘅最重要嘅高光時刻，同埋嗰1秒Interpret（表達）咗好多嘢出嚟，會感受到我嗰刻唔係純粹我一個，會感受到我嗰刻嘅狀態，見到觀眾懂我嗰種感覺、感動，我已經好滿足。」

蔡思貝升呢26億票房女星。

打到周身傷。

她謂因不能靠眼神做戲，演技提升了難度，而她就用最直接方式活演失明人士：「我係合埋眼去演，盲人有啲微妙動作，所以我喺朋友陪同嘅安全情況下，合埋眼去行商場感受吓嗰啲感覺，都有試過撞親。」又謂成功試鏡後，即展開訓練及在拍攝時，因應付大量密集動作及毆打戲，雙手布滿瘀傷、手指受傷需戴上固定器外，原來曾傷到送院，她憶述：「條吊威吔勒得下胯位好緊，我做完踢腳動作後就傷咗，啲武師話如果嚴重啲條筋會斷，好在我冇，嗰時覺得冇事就繼續拍，最近拉筋嘅時發覺左邊全身『唔聚財』，睇醫生先知裏面好多舊患，啲筋慢性發炎，依家康復中，筋腱係需要長時間復原，都唔舒服咗成年。」

雖然拍戲令她周身傷患，但又覺得受傷事少，在拍攝過程中獲益良多才事大，直言：「有呢個機會係我最大收穫，行街過馬路都可以仆親啦，我係絕對冇問題。（周星馳讚你打得最似李小龍嘅女演員，係咪獲心靈安慰？）當然感動、感恩同榮幸，知道星爺對李小龍有好大嘅仰慕之心同尊敬，我能夠喺呢個角色度呈現出佢嘅偶像，唔識點樣形容呢份開心，（都覺得打得似李小龍？）唔敢評論自己，只可以講我已經盡咗最大嘅努力去做囉，嗰時要諗點樣可以喺冇眼神嘅情況之下，都可以表現到嗰種嘅狠勁。」

蔡思貝在片中全程黑超遮面。

她坦言曾有擔心「曝光率」，但相信導演判斷。

問到如再和周星馳合作機會，可接受零片酬？她直言：「如果可以同自己偶像合作，絕對唔係用金錢衡量，片酬絕對唔係排行第一位嘅嘢，不過我都要搵食、養家，或者喺其他地方努力搵錢，咁星爺唔會唔畀錢，佢係個非常好嘅老闆。」更指能在周星馳身上學習，她無懼再挑戰打戲或面臨受傷；至於可望成為「星女郎」？坦白的她表示當然想，但不能強求，又難忘試鏡時跟周星馳傾了一個下午的電影，還獲贈漢堡包兩個，她說：「星爺問我有冇錢食飯，叫我漢堡包當晚餐喎。」

蔡思貝恨與周星馳再合作做「星女郎」。

而張繼聰在《功》中飾演裁判，雖然只拍了兩日戲，但跟周星馳互動多多，他說：「鍾意睇星爺啲報道，我都估佢係咪好惡啦，但其實周生係好好禮貌，成日唔該前、唔該後，辛苦晒咁樣，仲問我食唔食水果，覺得佢拍電影好認真同執着，所以好明白同佢合作嘅新人會易緊張。」問到周星馳及其經理人公司老闆古天樂兩者有何不同之處？他直言：「佢哋都好捱得苦又有承擔，佢哋承受嘅壓力，唔係普通人能想像到，啟發到我做人要少説話，多做事，做好自己要做嘅嘢。」

他又指當初聞戲名時，內心涼了大截，因是女子足球關係曾擔心連自薦機會也沒有，而在兩日拍攝中，印證了他對演戲的理論。問他在戲中遭女球星色誘，現實中可有類似情況？他說：「全行都知我結咗婚喎，只有9歲大嘅囡囡就主動啲。」

張繼聰是「串星」之一。