黎耀祥捱打七情上面 反擊詛咒龔嘉欣拍拖都會散. 黎耀祥、龔嘉欣、倪嘉雯、孔德賢、關嘉敏、莊思敏等今日（25日）在觀塘出席無綫劇集《香港探秘地圖》宣傳。倪嘉雯、關嘉敏、羅雪妍、鄧伊婷與黃子桐變身「女團」齊跳狐仙舞，莊思敏示範用英文打小人後，眾人齊齊模仿，倪嘉雯要打走渣男、關嘉敏笑說「打走阻我上位嘅小人」。龔嘉欣揚言要打「老闆」黎耀祥，「捱打」嘅黎耀祥七情上面笑言似「滿清十大酷刑」，但之後反擊「詛咒」嘉欣拍拖都會散，相當搞笑。

黎耀祥同龔嘉欣接受訪問時皆話冇試過打小人，問到係咪冇小人要打，黎耀祥笑言：「希望啦，自己都唔在意有冇小人，所以都冇話要刻意化解。」佢又話拍劇多年，就算喺傳聞多多嘅公司休息室瞓覺，都冇遇過靈異事件。龔嘉欣被問到需唔需要打走渣男，佢話：「唔使，又唔使去到咁仇恨。」

黎耀祥、龔嘉欣同倪嘉雯一齊拍跳舞片為劇集宣傳，片段喺社交網好受歡迎。龔嘉欣話：「條片好勁，過百萬點擊，大家回憶返黎耀祥扮羅記，話原來黎耀祥咁玩得，諗住再搵佢拍片，有啲高難度動作但要練下。」黎耀祥笑言：「嗰個做唔到，又要倒立、又要反轉個人，唔係唔想做，係做唔到，我驚要Call定白車。我哋而家條腰唔係話撐就撐，等我練吓先。而家唔同平台要唔同嘢去吸引人，好欣賞佢哋搵渠道同觀眾溝通，我就試吓，都要與時並進。」TVB