陳煒歷代劇中「仔女」多災多難 網民爆笑封「罪犯之母」.TVB熱播劇《正義女神》最近掀起全城追劇熱潮，劇中由陳煒（煒哥）飾演的大律師「高淑樺」，與劉倬昕反串出演的兒子「高成彬」之間那段扭曲的母子情，早已成為網民熱議的焦點話題。

最近有網民喺Threads發起「考古」大行動，唔查唔知，一查就挖出個超驚人的巧合：原來歷年嚟劇集入面飾演過陳煒「仔女」的角色，唔少都係「衰仔衰女」，統統都逃唔脫同法律扯上糾纏的命運。

呢份「起底名單」一出即刻喺網上瘋傳，當中就包括依家熱播緊的《正義女神》，劇入面佢個仔劉倬昕捲入謀殺案，搞到煒哥為佢費盡心機；而今年年初播出的《非常檢控觀》入面，飾演佢兒子的丘梓謙，最終都係自首入獄收場。

再數返去2022年，《黯夜守護者》入面佢個仔楊凱博，因為牽涉不良少年死亡案被帶返警署；《回歸》入面的兩個仔周嘉洛同吳偉豪，仲試過因為家庭糾紛，要同親媽對簿公堂。就連早至2016年的《火線下的江湖大佬》，入面佢個繼女岑麗香，都有過短暫「入冊」的經歷。

睇完呢份清單，網民紛紛發揮搞笑本色留言玩梗：「做煒哥啲仔女，就算唔坐監，都要去警署或者法庭行一轉」、「煒哥做咩成日教啲犯出嚟嘅？」，仲有人天馬行空提議：「可以拍套戲，搵煒哥個仔或者女綁架宣萱、害死羅樂林，最後由吳卓羲去拉人」，更有網民直接封咗煒哥做「最強罪犯之母」。TVB